Með vísan til laga nr. 65/2020 um Kríu – sprota- og nýsköpunarsjóð, reglugerð nr. 255/2021, og starfsreglna stjórnar, er hér með auglýst eftir umsóknum frá sérhæfðum sjóðum um fjárfestingu frá Kríu – sprota-og nýsköpunarsjóði. Frekari upplýsingar um skilyrði er að finna í 5. gr. reglugerðar 255/2021 um Kríu – sprota-og nýsköpunarsjóðs.

Vakin er athygli á breytingum sem gerðar hafa verið á reglugerð nr. 255/2021 um Kríu – sprota- og nýsköpunarsjóð sbr. reglugerð nr. 1408/2022 og auglýsingu um breytingu á starfsreglum stjórnar Kríu – sprota- og nýsköpunarsjóðs sbr. auglýsingu nr. 1409/2022.

Þeir sérhæfðu sjóðir sem telja sig uppfylla skilyrði Kríu þurfa að senda tölvupóst á umsoknir@kriaventures.is til þess að nálgast umsóknareyðublað og frekari gögn frá sjóðstjóra.

Umsóknarfrestur er til og með 28. apríl 2023.
‍

• Stofnfé sjóðsins er að lágmarki 4 milljarðar kr. að undanskildu því stofnfé sem Kría - sprota- og nýsköpunarsjóður skráir sig fyrir og sjóðurinn hafi fjármagnað að minnsta kosti 70% af heildar stofnfé, að undanskildu því stofnfé sem Kría - sprota- og nýsköpunarsjóður skráir sig fyrir, á þeim tíma sem umsókn er send inn,
• rekstraraðilisjóðsins, ábyrgðaraðili sjóðsins eða raunverulegir eigendur þeirra, skulu vera eigendur hluta í sjóðnum, auk að lágmarki þriggja einkafjárfesta sem eru ótengdir, ekki í samstarfi og hver um sig hefur skráð sig fyrir stofnfé sem nemur að minnsta kosti 10% af heildar stofnfé sjóðsins,
• enginn einn fjárfestir hefur skráð sig fyrir stofnfé sem nemur meira en 50% af heildar stofn­fé sjóðsins,
• að sjóðnum komi aðili sem hafi umtalsverða reynslu, þekkingu og árangur í alþjóðlegu umhverfi fjárfestinga í sprota- og nýsköpunarfyrirtækjum,
• sjóðurinn hafi ekki á þeim tíma sem þátttaka Kríu - sprota- og nýsköpunarsjóðs er sam­þykkt, fjárfest hærra hlutfalli en sem nemur 25% af heildar stofnfé sínu.
• stofnsamningur eða reglur sjóðsins mæli að minnsta kosti fyrir um að:
  • sjóðnum beri að fjárfesta að minnsta kosti því sem nemur framlagi Kríu - sprota- og nýsköpunarsjóðs af heildarfjármagnsframlagi sínu og óinnheimtu stofnfé, sem fjár­festar hafa skráð sig fyrir, í sprota- og nýsköpunarfyrirtækjum með starfsemi á Íslandi,
  • sjóðnum sé að meginstefnu til ætlað að fjárfesta snemma í vaxtaferli sprota- og nýsköpunarfyrirtækja,
  • fjárfestar hafi enga aðkomu að ákvörðunum um fjárfestingar sjóðsins, og
  • sjóðurinn verði óvogaður,
• sjóðurinn er settur upp í samræmi við það sem tíðkast alþjóðlega um sambærilega sjóði hvað varðar meðal annars lagalega uppsetningu, líftíma, þar sem skýr og raunhæf útgöngu­áætlun liggur fyrir, hlutverk og þátttöku fjárfesta, ávöxtunarkröfu fjárfesta, kostnað og ábata almennra þátttakenda,
• sjóðurinn sé rekinn af viðurkenndum rekstraraðila eða viðkomandi viðurkenndum sérhæfð­um sjóði, enda heimilar rekstrarlegt form viðurkennda sérhæfða sjóðsins innri stjórnun og stjórn sjóðsins hefur ekki tilnefnt annan rekstraraðila,
• rekstraraðili sjóðsins, sjóðurinn, stjórnendur hans og þeir fjárfestar sem hafa skráð sig fyrir stofnfé hafi nægilega reynslu af stofnun, rekstri og/eða aðkomu að viðurkenndum sérhæfð­um sjóðum og sprota- og nýsköpunarfyrirtækjum að mati stjórnar Kríu - sprota- og nýsköp­unarsjóðs sem og hafi nægilegan fjárhagslegan styrk og gott orðspor til að tryggja framgang sjóðsins og að markmiðum laga nr. 65/2020, um Kríu - sprota- og nýsköpunarsjóð, og reglu­gerðar þessarar megi ná, að mati stjórnar Kríu - sprota- og nýsköpunarsjóðs.